Редослед на кандидатите за претседател на гласачкото ливче:
1.Стево Пендаровски – СДСМ
2.Гордана Силјановска Давкова – ВМРО-ДПМНЕ
3.Стевчо Јакимовски – ГРОМ
4.Бујар Османи – ДУИ
5.Билјана Ванковска – Левица
6.Арбен Таравари – ВРЕДИ
7.Максим Димитриевски – Движење ЗНАМ
Вака ќе изгледа гласачкото ливче на престојните претседателски избори закажани за 24 април – прв круг и вториот на 8-ми мај. Преку ждрепка во Државната изборна комисија, претставниците на претседателските кандидати ги извлекоа редоследните броеви на 7-те имиња кои ќе се тркаат за вселување во Вила Водно.
Според законскиот роковник, во ДИК досега се тече во најдобар ред, а според истиот 4 април ќе започне изборната кампања за претседателските избори, а ќе заврши на 22 април на полноќ.
- „Во моментов ги чекаме предлозите на политичките партиите, за избирачките одбори, по еден од власта и опозиција, и предлозите за гласање во ДКП, тоа ќе бидат следните дејствија и сите дејствија според закон кои се пропишани во роковникот, ги спроведуваме, а знаете сите дека заврши јавниот увид во Избирачкиот список“ рече Даштевски – Претседател на ДИК.
Дијаспората ќе гласа само за избор на шеф на државата бидејќи не се пријавиле доволен број гласачи односно колку што имал поддршка еден пратеник на последните парламентарни избори.
- „Некаде околу 2900 и нешто се пријавија, не се сите прифатени но најголемиот дел се прифатени. Најголем број се пријавени во Германија, во САД, Канада, Австралија, но и во другите европски држави. Во некои нема, но тоа допрва ќе се утврдува, но тие ќе гласаат само за претседател..“ рече Александар Даштевски – Претседател на ДИК.
На партиите им остануваат 10 дена до почетокот на кампањата за претседателските , а течат и роковите за подготвување на листите за парламентарните избори.
Листите на кандидати за пратеници во Собранието овластените претставници на предлагачите ги доставуваат до ДИК најдоцна до полноќ на 2 април.
