Се уште е во критична состојба педесет и тригодишниот маж кој вчера се затру на фарма во светиниколското село Амзабегово,а неговиот колега почина. Дополнителни испитувања треба да покажат дали ќе има потенцијални мозочни оштетувања. Нивните соселани, денеска одвај ја коментираат трагедијата. Велат, мора некој да сноси одговорност доколку се утврдат било какви пропусти..
„Оваа фарма работи педесет години и вакво нешто се нема случено. Како дошло до труење од гас, од амонијак..баш ми е чудно. Сега некој ќе треба да сноси одговорност, не може таа шахта да биде отворена и да влегува секој„ изјави жител на село Амзабегово.
Во текот на вчерашниот ден инспекциски надзор на лице место изврши и трудов инспектор. Инспекторите утврдиле дека починатиот работник немал респираторна заштита, а во текот на денот работодавачот треба да им ја достави целосната документација.
„Од страна на инспекторите е задолжено во текот на денешниот ден да ја презентира на увид потребната документација . И по утврдување и разгледување на истата, ДТИ ќе излезе во јавност со целосна информација за случајот„ изјави Весна Томовска, дир.на Државен трудов инспекторат.
Според првичните информаии сега починатиот работник ја отворил решетката која ги поврзува халата со дупка. Тој се симнал во дупката за да интервенира на заглавениот шибер, кој го повлекува течното ѓубриво од халата, кон дупката. 45годишниот работник починал, а неговиот колега кој притрачал да му помогне во последен момент бил извлечен од останатите колеги. За каков гас станува збор, ќе покаже обдукцискиот наод.
