Денеска или ќе бидат разрешени директорите на М-НАВ или контролата на летање ќе го затвори воздушниот простор над Македонија. Синдикалците велат дека немаат друга опција освен да прекинат со работа се додека не се исполнат нивните барања.
„Се надеваме дека сето ова што се случи ќе резултира со разрешување на директорите во М-НАВ. Во спротивно и Владата ќе покаже дека не и е битно ништо освен фотелјите“, велат од Синдикатот.
Иако инцидентот се случи во четвртокот, премиерот не виде причина да свика вонредна владина седница во петокот, што беше работен ден. Тој и министрите решија да одморат за божиќните празници, па одлуки да донесат на редовна седница.
Додека Владата одлучува за судбината на Хамиди и колегите, Финансиската полиција влегува во М-НАВ за да го испитува работењето на државната компанија. Ќе ја чешлаат документацијата за финансиското работење, најмногу во делот на вработувањата, но и јавните набавки.
Синдикалците со години предупредуваат дека јавното претпријатие за контрола на летовите, наместо високата стручност што ја бара таквата работа, се полни со некомпетентни кадри од страните кои управуваат со таа компанија.
