По скоро осумнасет часа од Новата година, се слушна плачот на првото бебе родено во штипската Клиничка болница. Глорија Стојковска од Македонска Каменица во 17.55 часот на свет ја донесе малата Деа..
„Супер е бебенцето. Прво ни е многу сме возбудени„ изјави среќната мајка Глорија Стојковска од Македонска Каменица.
Но кривата на наталитетот оди надолу, а бројот на новородени постојано опаѓа. Според податоците на Државниот завод за статистикa, во третото тримесечје од минатата година, бројот на живородените се 4.453 деца и во споредба со 2022, бројот е намален за 9,8%. Негативен тренд бележи и штипската болница. Ако пред неколку години се раѓаа над 1000 бебиња, сега нивниот број е десеткуван.
„2023 ја завршивме со околу 500 породувања. Во споредба со 2022 имаме околу 60 породувања помалку„ изјави д-р Наталија Атанасова, гинеколог-акушер во штипска Клиничка болница.
Ова е данокот што го плаќаме откако младите ни се иселија од државата, коментираат граѓаните според кои недовербата во системот и ниските плати се причина за „белата чума“ која силно галопира низ нашата држава.
Демографскиот аларм е најизразен во помалите општини, а доказ за тоа е што во Зрновци на пример, лани дури во октомври се роди првото бебе. Според податоците, меѓу двата пописа бројот на средношколци во Македонија е намален за 24.000 ученици.
Александра Ристевска
