Се поизвесно е дека СДСМ и ДУИ на следните избори ќе одат со заеднички листи. Иако тоа, прецизно не го потврди премиерот Димитар Ковачевски – одговорот во завиена форма дека со коалиционите партнери делат вредности, води кон тоа дека довербата од гласачите ќе ја бара заедно интегративците. Премиерот не одговори конкретно и дали ќе има консензуален кандидат за претседател на Македонија.
Како ќе изгледаат листите, тоа зависи од политичките партии, но СДСМ ќе има широка коалиција која што се покажала дека може да ги води успешно политиките и во државата и меѓународно. Влезе во НАТО, до 2030 година ќе влезе во ЕУ. Политичките партии исто така ќе се водат верувам од тие принципи, бидејќи коалиции се прават на база на вредности – рече Ковачевски.
На шест месеци од одлуката на граѓаните – кој ќе ја предводи државата, партиите се поделени. На едната страна се владејачките СДСМ, ДУИ, Алијанса за Албанците. На другата страна се албанските опозициски партии, движењето на Меџити, Беса на Билал Касами и Алтернатива на Африм Гаши) кои веќе се обединија под името Европски сојуз за промени и опозициската ВМРО-ДПМНЕ.
Но во владиното партнерство изгледа ќе се појави уште еден проблем. Дека Димитар Ковачевски е единствениот кој уште му е верен на Али Ахмети, покажува и информацијата која ја доби Алфа од извори во Алијанса за Албанците дека партијата не остава никаква можност да оди на заедничка листа со ДУИ.
Заедничка листа на СДСМ и ДУИ подразбира дека на пример, во изборна единица број 6 (реонот на Тетово и Гостивар), носител на листата за пратеници ќе биде кадар на ДУИ, а второто место ќе биде резервирано за СДСМ. Во изборните единици 3 и 4 пак, (реоните на Штип, Велес, Струмица, Прилеп, Гевгелија) носител на листата би бил СДСМ, а подолу местото ќе биде за ДУИ.
