Буџетските приоритетни расходи ќе се покриваат со кредит од Шпаркасе банка во износ од 50 милиони евра. Оваа одлука била донесена на Владина седница, а денеска во јавноста ја пласираше и првиот човек на финансии. Бесими, кој уште од мај го чека евтиното задолжување, кажа дека и овој кредит е подигнат бидејќи се уште не е поволен пазарот, односно каматните стапки се далеку повисоки од лани за издавање на еврообврзницата која е планирана со Ребалансот на Буџетот. Задолжувањето ќе било со 2,2% камата а ќе се користело за покривање на буџетски расходи.
Ние сега работиме со банките да обезбедиме поповолни услови. Ова го работиме неколку месеци и така дојдовме до овие 50 милиони. Ова задолжување се користи за буџетски тековни трошоци. Парите ние ги земаме во трезори и ние сега гледаме каква ни е позицијата на расходна страна, кажа Бесими.
Владата ќе го отплаќа овој кредит 12 месеци со каматна стапка од 2.2 отсто. Спроед првиот човек на финансии ваквиот начин на краткорочно задолжување може да се случува и до крајот на годината, ако не се создадат поволни услови за ееврообврзница.
На Македонија и се потреби 900 милиони евра за да се покрие буџетскиот дефицит од 700 милиони и 200 милиони за вкупниот долг како што кажа Бесими. Потребните пари со кој ќе се покрие буџетската дупка, Владата по се изгледа не планира да ги обезбеди со рационално работење дома.
Додека се задолжуваме на сите страни, никако да почнеме да кратиме на буџетари. За една година бројот на институции во јавниот сектор се зголемил за 14 за само една година покажа последниот извештај на МИОА. Формирани се 19 нови институции, а 5 се згаснати, укинати или трансформирани. Притоа од вкупно 1.346 институции, 8 имаат само раководно лице, во 32 нема вработени, а во 24 нема ниту раководно лице ниту вработени. На прашањата од АЛФА до МИОА за тоа кои се новите органи, зошто некои повеќе не постојат и каде можат да се видат годишните извештаи за сработеното нема одговор, а молк и од Владата дали планираат да го ревидираат работењето на малку познатите институции.
Кристина Алексиеска
