Започнаа уписите на првачињата за учебната година која следи, но под посебни услови. Просветните работници под ригорозни мерки ги тестираат најмладите, а во школските дворови го нема познатиот метеж од родители и деца како што беше изминативе години. Пандемијата со корона вирусот наметна посебен начин на функционирање и во воспитно-образовниот систем.
Тестирањето започна денеска а ќе трае до 30 јуни со што ќе се тестира на секој половина час по едно дете, во период од 09:00 до 13:00 часот.
“Тестирањето ќе се врши во посебни услови, на влезовите има средства за дезинфекција и лична заштитна опрема, ќе влегуваат по едно дете и еден родител, ќе се прави пауза од 30 минути со цел да се дезинфицираат површините и опремата за тестирање на децата” – вели за Алфа Фоника Станоева, педагог во ОУ. “Блаже Конески” – општина Аеродром.
Наместо во мај, како што е утврдено во Законот за основно образование, оваа година уписите се одложија за еден месец подоцна поради заштита од зараза со Корона вирус, а родителите ќе имаат на располагање еден месец да ги запишат своите деца во основно училиште. Резултатите од тестирањата треба да бидат објавени на 15 јули.
Адријана Алексиеска
