Нови 18 позитивни на Ковид 19, со што бројката на заболени во земјава се искачи на 219, a 7307 се во самоизлоација.
Десетици лица од јавното претпријатие Национални шуми седат дома, откако кај двајца вработени меѓу нив висок функционер во претпријатието било детектирано дека се позитивни на Ковид 19. Како што дознава Алфа вработените биле пуштени дома минатиот петок, а вчера добиле информација од здравствените власти дека треба да останат во самоизолација уште 14 дена. Еден од веќе позитивните на Корона, според нашите информации, пред да му биде утврден вирусот имал средби и со дел од вработените во СВР Велес, по што велешката полиција била дезинфицирана.
Во меѓувреме позитивен на Корона е и вработен на Клиниката за кардиологија, тој болен доаѓал на работа. Кардиологија сега функционира, бидејќи на работа е тимот кој немал никаков контакт со вработените во чија смена доаѓал на работа заболениот. Министерот Венко Филипче уверува дека секој здравствен работник кој свесно се појавил на работа, иако имал симптоми ќе сноси одговорност.
– Секој здравствен работник кој свесно се појавил на работа, иако имал симптоми ќе сноси одговорност, изјави Венко Филипче министер за здравство.
Во државата има вкупно 17 заболени здравствени работници, но според Филипче, тоа не значи дека се заболеле бидејќи не ги почитувале протоколите, за што пример е Инфективната клиника, каде што нема заразен лекар, рече министерот.
На клиниката за Инфективни болести бројот на хоспитализиране достигна до 44 пациенти од кои 7 се со влошена здравствена состојба. За оние граѓани кои се вратиле во змејава од странство и биле во самоизлоација две недели, а немале симптоми, мерката за самоизолација им се продолжува за уште 14 дена.
Катерина Гетева
