Министерството за финансии, ќе зема кредит од над половина милион евра за справување со вирусот КОВИД-19. Бидејќи кредитот се зема во време на техничка влада, односно за истиот се потребни врзани потписи, барањето за заем освен од министерката Нина Анѓелеска, добил параф и од заменик техничката министерка од редовите на ВМРО ДПМНЕ Гордана Димитриеска Кочоска.
Лидерот на опозицијата Христијан Мицкоски денеска преку социјалните мрежи посочи дека тие како партија нема да пишуваат писма до кредитобарателите како што тоа на времето го правеше СДСМ, бидејќи на компаниите и државата во овие кризни времиња и се потребни пари, затоа задолжувањето на Владата иако непопуларна, е единствена опција во овој момент за да му се помогне на стопанството.
Барањето за заем од ММФ е во висина од 87 милиони евра, Светска Банка од 100 до 120 милиони евра, и од странските банки до 400 милиони евра.
„ Многу поважно во овој момент се мерките кои ќе се воведат за да овие пари правилно се искористат и се помогне на компаниите. Уште еднаш ја повикувам владата да донесе мерка со која државата ќе покрие 50% од трошоците за вработените, плати и придонеси. Да се замрзнат плаќањата на рати кон банките и заемодавателите бидејќи тоа е добро и за банките, но и да се излезе со детална програма на Владата и функционерите на власт за финансиско кратење на нивните привилегии и непродуктивни трошења.“ напиша Мицкоски на Фејсбук.
Воедно преку видео обраќање апелираше до граѓаните да купуваат македонски производи.
