Полициски службеници, во координација со Основното јавно обвинителство за гонење организиран криминал и корупција, денеска лишиле од слобода вработен во Дирекцијата за заштита и спасување, осомничен за примање поткуп. Станува збор за лице кое работело како советник во ДЗС, а според првичните информации, од граѓанин побарало 500 евра за издавање позитивно мислење потребно за изградба на градежен објект.
Директорот на Дирекцијата, Стојанче Ангелов, во порака испратена до медиумите напиша дека пред неколку дена оштетениот граѓанин му се пожалил дека вработен во институцијата му барал пари.
Ангелов ја поздрави акцијата на МВР и ги повика граѓаните кои се соочуваат со незаконско поведение на кој било вработен во Дирекцијата, истото веднаш да го пријават во надлежните институции.

