Речиси осум од десет анкетирани туристички субјекти во Скопскиот плански регион ги сметаат трошоците за енергија за значаен товар за работењето, а можностите за намалување на овие трошоци преку енергетска ефикасност и користење обновливи извори на енергија ќе бидат тема на Националниот форум за зелен туризам што утре ќе се одржи во Скопје.
Форумот, во организација на Центарот за одржлив развој АЛКА и Фондацијата Албиз, ќе се одржи во Europe House, а на него ќе бидат презентирани наодите од анализата спроведена во рамки на проектот „Energy Wise – Зајакнување на руралниот туризам преку обновливи извори на енергија и енергетска ефикасност“.
Според анализата, која опфатила 33 туристички субјекти во Скопскиот плански регион, 78,8 проценти од испитаниците изјавиле дека енергетските трошоци претставуваат значаен финансиски товар, 54,5 проценти сè уште не користат обновливи извори на енергија, додека 81,8 проценти покажале интерес за мерки за енергетска ефикасност и користење обновливи извори.
Во фокусот на форумот ќе бидат можностите за намалување на трошоците за енергија кај малите туристички и семејни бизниси во руралните средини, како и институционалната поддршка потребна за воведување на вакви решенија.
На настанот ќе бидат претставени анализата, искуствата од практичните обуки, тријазичен прирачник за зелен туризам и повелбата „Eco-Steward“ за давателите на туристички услуги.
Во рамки на форумот ќе се одржи и панел-дискусија на која ќе учествуваат експерти од областа на енергетската ефикасност, истражувачи и претставници на институции и туристичкиот сектор, кои ќе разговараат за применливите решенија за поодржливо и поекономично работење во туризмот.

