Министерката за енергетика, рударство и минерални суровини Сања Божиновска преку својот фејсбук-профил упати чиститка до граѓаните по повод 13 Ноември, Денот на ослободувањето на Скопје.
– На овој ден со почит и благодарност се потсетуваме на сите храбри луѓе што се бореа и ги положија своите животи за слободата на нашиот град. Со особена почит и благодарност се сеќаваме на храброста, пожртвуваноста и историската борба на сите што го положија својот живот за слободата на Скопје, 13 ноември е датум што трајно го одбележува нашиот историски и национален идентитет. Тоа е ден кога се потсетуваме дека слободата не е само изборена вредност, туку и одговорност што ја носиме кон генерациите пред нас и оние што доаѓаат по нас – наведува Божиновска.
Министерката изразува верување дека најдобар начин да им оддадеме почит на оние што ни ја овозможија слободата е да продолжиме да работиме за Скопје во кое идните генерации ќе сакаат да живеат и да ја градат својата иднина.
Според неа, Скопје е град со богато историско наследство, кој во текот на својата историја покажал сила, истрајност и способност повторно да се издигне.
– Скопје во текот на историјата поминало низ многу предизвици, но секогаш наоѓало сила повторно да се издигне. Токму во тоа е неговата посебност. Во луѓето, нивната истрајност, солидарност и љубов кон градот. Неговата приказна е приказна за луѓето, за солидарноста, за заедништвото и за вербата во подобра иднина. Наш долг е да го чуваме споменот на оние што се бореа за слободно Скопје, но и со посветена работа, визија и одговорност да придонесуваме за неговиот развој, напредок и подобра иднина – пишува во честитката.
