Центарот за развој на Југоисточниот плански регион денес го додели и четвртото амбулантно возило наменето за Општина Гевгелија, како дел од проектот „Кон прекугранична област, безбедна за срцето – Heart Safe CBA“ во рамки на ИПА програмата за прекугранична соработка со Република Грција.
Од организацијата велат дека ова е последното од четирите целосно опремени амбулантни возила, кои досега беа доделени и на останатите општини опфатени со проектот – Струмица, Радовиш и Валандово.
Новото возило ќе послужи за итните медицински интервенции, а придобивки ќе имаат општините и граѓаните од целиот Југоисток, беше истакнато на примопредавањето на донацијата на која учествуваа директорот на Центарот на Југоисточниот регион, Јован Коцев, директорот на Општата болница во Гевгелија Патрик Матх и градоначалникот на Општината, Андон Сарамандов.
– Верувам дека ова ново амбулантно возило ќе ги подобри условите во болницата и ќе придонесе за навремена и квалитетна медицинска помош за нашите сограѓани. Истовремено тоа значи и подобри услови за медицинскиот персонал. Реализацијата на овој проект е резултат на добрата соработка помеѓу институциите – посочи градоначалникот Сарамандов.
Тој потсети дека Општина Гевгелија во изминатиот период аплицирала со повеќе проекти на повиците за погранична соработка со Република Бугарија и Република Грција и покрај амбулантното возило, предвидени се и други проекти меѓу кои реконструкција на старото школо во Серменин, нов модерен парк, возило за лицата со попреченост, донација од два дефибрилатори за Болницата и граничниот премин, како и еден ЕКГ апарат.
Како Центар овде нема да застанеме, и ќе продолжиме во иднина да реализираме вакви проекти, нагласи директорот на организацијата, Коцев.
– Со набавката на ова ново амбулантно возило придонесуваме кон подобрување на условите за работа на медицинските екипи и побрзо реагирање при итни случаи. Покрај амбулантните возила здравствените домови ќе се здобијат и со амбулантна опрема како ЕКГ апарати, автоматски и полуавтоматски дефибрилатори. Исто така морам да напоменам дека претходно дел од здравствените работници од сите здравствени домови се стекнаа со специјални обуки кои се одржаа во Солун и Струмица, каде се здобија со меѓународни признаени сертификати – рече Коцев.
Проектот се реализира во рамките на „Интерегг ИПА Програма за прекугранична соработка” помеѓу соседна Грција и Македонија за период од 2021-2027, кофинансирана од Европската Унија и националните фондови на земјите учеснички, а ќе биде во времетраење од 24 месеци, со вкупен буџет од 1.217.146 евра.
