Во Делчево се одржа традиционална ликовна работилница, во организација на Центарот за култура „Никола Јонков Вапцаров“, а во соработка со Дневниот центар за лица со посебни потреби.
Настанот обедини млади автори, учесници и корисници од дневниот центар, кои низ сликање, бои и креативност ја покажаа својата уметничка експресија, споделувајќи заеднички мигови на дружење и инклузија.
Според Александар Белогаски, стручен соработник за дејности на месности при Центарот за култура во Делчево, ваквите ликовни работилници претставуваат традиционална активност која се организира секоја година.
-Традиционално секоја година организираме ликовна работилница заедно со лицата од Дневниот центар за посебни потреби. Голема благодарност сакам да им укажам на учесниците кои дојдоа да учествуваат – ученици од средното училиште, ликовни критичари, академски сликар, како и децата од Дневниот центар за лица со посебни потреби – истакна Белогаски.
Организаторите најавија дека соработката и сличните инклузивни работилници и дружења ќе продолжат и во иднина, со цел уште поголема поддршка, социјализација и реализација на заеднички креативни проекти
Изработените ликовни дела по завршувањето на работилницата ќе бидат изложени во просториите на Дневниот центар во Делчево.
