Подигнување готовина, исплата на плати, придонеси и даноци. Едно по едно, се враќаат услугите на Алта Банка АД Битола, која по Битола, Струмица и Тетово, веќе функционира со експозитура и во Скопје. Повеќе граѓани од утрината си ги подигнуваа парите согласно утврденото. Граѓаните се вознемирени, но и задоволни што банката повторно функционира. Си ги подигнуваат парите, но и критикуваат дека паниката што се шири во јавноста им создава страв и нервоза:
Веќе функционираат и електронското банкарство и мобилната апликација. Најдено е решение и за платите и придонесите за фирмите кои во последните три месеци редовно исплаќале плати преку платежните сметки во банката. Исто така, износот на средствата што може да се користат од платежната сметка на фирмата во „Алта банка“ за исплата на плати може да биде повисок до 5% во однос на вкупниот износ на платите исплатени во октомври. На овој начин, според Народната банка, се овозможува продолжување на постојните текови на исплата и исполнување на обврските кон вработените и државата, а истовремено се задржува контролата врз одливите на средства од банката.
„Со измената се овозможува и физичките лица во целост да располагаат со новите приливи на своите сметки во „Алта банка“ АД Битола, доколку средствата доаѓаат од платежни сметки отворени кај други банки и даватели на платежни услуги. Тоа значи дека граѓаните можат без ограничување на износот да ги користат средствата коишто дополнително ќе им бидат уплатени врз оваа основа“, велат од Народна банка.
Дека состојбата со битолската банка почнува да се нормализира, покажува и тоа што веќе неколку банки и финансиски институции покажуваат сериозен интерес за нејзино купување. Народната банка со дел од нив веќе имала и конкретни разговори.
