Граѓаните си ги подигнуваат парите на шалтер во Битола, додека власта се бори за брз спас на банката. Премиерот Мицкоски обелодени дека веќе имало закажани средби со повеќе финансиски институции заинтересирани за купување на акциите на српската Алта банка во битолската. Активностите за ова вели допрва ќе се интензивирале. Според него, додека власта се обидува да најде купувач за Алта банка Битола, опозицијата се радува на црни сценарија. Вака тој реагира на обвинувањата од опозицијата дека двете сценарија за иднината на Алта банка Битола, едното за наоѓање купувач, а другото за прогласување стечај се неодржливи и не нудат решенија за граѓаните и заштита на народните пари.
Премиерот Мицкоски уште еднаш ги повика граѓаните да не веруваат во оние кои зборуваат невистини и шират паника за банкарскиот сектор. Вели проблемот со Алта банка Битола е увезен од Србија и нема никаква врска со нивното работење. Уште еднаш потенцираше дека многу поголем проблем е банкротот или проблемите во функционирањето на фирмите од Србија кои се деловни партнери на македонските компании.
Народната банка продолжува со активностите согласно Законот за банки. По одземањето на гласачките права на акциите, стечајниот управник има краток рок да ги продаде акциите, а ако тоа не го направи, процедурата ја презема Народната банка, по што следи јавна понуда на акциите на Македонска берза. Откако гувернерот Славески пред неколку дена рече дека најмалку 4 до 5 банки се заинтересирани за купување на уделот на Алта банка Белград во Алта банка Битола, во јавноста како најсериозни кружат имињата на една банка од топ 3 во Македонија и една во сопственост на странски инвеститор. Финансиската кондиција на банката е солидна. Вкупната актива изнесува 183 милиони евра, а капиталот и резервите 32 милиони евра.
