Празничната програм на Општина Битола посветена на 4-ти ноември, денот на ослободувањето на градот продолжува со екслузивно слушање на музичкиот материјал од албумот „All Colors of M“, во кој учествуваат Оливер Јосифовски, Исмаил Љумановски, Алек Секуловски и Давор Јордановски.
Од Културно информативен центар (КИЦ) Битола информираат дека манифестацијата „Полноќни приказни од Офицерскиот дом“, е дел од „Сите бои на сеќавањето“ и можност публиката да ја слушне музиката од винилно издание кое наскоро ќе биде промвирано.
Во средиштето на албумот се четири музички индивидуалности, со различни авторски и изведувачки искуства. Нивното поврзување отвора простор за средба на композицијата и импровизацијата, на музичката меморија и современиот израз. Секој од нив носи свој пат, изграден низ концерти, снимања, соработки и истражувања што одамна ги надминале домашните граници.
За потсетување, Оливер Јосифовски е контрабасист, композитор и продуцент, препознатлив по работата со групата „Љубојна“ , Исмаил Љумановски е кларинетист со меѓународна кариера, Алек Секуловски е со долгогодишно искуство како тапанар, концертен и студиски музичар и педагог, а Давор Јордановски е клавијатурист, композитор, аранжер и продуцент, чиј професионален пат ги поврзува Македонија и Канада.
