Претседателот на Собранието, Африм Гаши, денеска остварил средба со новоименуваната британска амбасадорка Маја Сивањанам, на која беа разгледани можностите за унапредување на билатералната соработка и продлабочување на парламентарните односи меѓу двете земји.
Како што соопшти соопшти собраниската прес-служба, Гаши ѝ посакал добредојде на амбасадорката и успешен дипломатски мандат, истакнувајќи ја долгогодишната соработка меѓу Македонија и Обединетото Кралство. Посебен акцент ставил на поддршката преку Вестминстерската фондација за демократија, која придонесува за зајакнување на капацитетите и функциите на Собранието и неговата служба.
На средбата Гаши изразил очекување за натамошно реализирање на соработката на ниво на претседатели на парламенти, пратеничките групи за соработка во двата парламента и меѓукомисиската размена на најдобри практики и искуства.
Амбасадорката Сивањанам изразила задоволство од значајната соработка со Собранието на која, како што посочила, ќе посвети соодветно внимание за време на нејзиниот мандат. Притоа, го запознала Гаши со приоритетите и фокусот на работа во следниот период, со акцент на натамошно развивање на дипломатските односи и севкупната билатерална соработка меѓу двете држави.
Двајцата соговорници размениле мислења околу претстојните активности на Собранието и можностите и модалитетите за освежување на динамиката на веќе утврдената соработка меѓу двата парламента.
На средбата било потенцирано значењето на Стратешкото партнерство и Договорот со кој се уредуваат трговските односи меѓу двете земји, како и натамошната поддршка на европската агенда на РС Македонија од страна на Обединетото Кралство.
