Градоначалникот на Општина Чаир, Изет Меџити, во Старата скопска чаршија денеска ја пречека претседателката на Собранието на Република Косово, Албулена Хаџиу, со која оствари пријателска средба посветена на односите меѓу Косово и Македонија, институционалната соработка и можностите за нејзино унапредување во области од заеднички интерес.
Како што соопшти Општина Чаир, на средбата се разговараше за значењето на зајакнувањето на добрососедските односи, кои се темелат на историските, културните и општествените врски меѓу двете земји. Посебно внимание беше посветено на потребата од континуирана меѓуинституционална комуникација и препознавање нови можности за соработка, во насока на развој и остварување на заедничките интереси.
-Ми претставуваше особено задоволство што во Скопје ја пречекавме претседателката на Собранието на Република Косово, г-ѓа Албулена Хаџиу. Косово и Северна Македонија ги поврзуваат значајни историски, културни и братски врски, кои претставуваат цврста основа за продлабочување на нашата соработка. Во текот на разговорот го истакнавме значењето на континуираниот дијалог, зајакнувањето на институционалните односи и унапредувањето на иницијативите од заеднички интерес. Верувам дека блиската соработка меѓу двете земји придонесува за развојот, стабилноста и нашата заедничка иднина-изјави Меџити.
На крајот од средбата, градоначалникот Меџити изразил благодарност за посетата на претседателката на Собранието на Косово, Албулена Хаџиу, посакувајќи ѝ успех во извршувањето на нејзините институционални должности. Воедно, тој повторно го нагласи значењето на негувањето добри односи и континуираното унапредување на соработката меѓу Косово и Северна Македонија.
