Федералната унија на европските националности ја објави резолуцијата за Македонците во Албанија на три јазици: англиски, германски и руски – информираат од Македонско друштво „Илинден”-Тирана.
Резолуцијата на Федералната унија на европските националности (ФУЕН) со која се поддржуваат Македонците во Република Албанија во барањата за надминување на проблемите, ја објави на три јазици: англиски, германски и руски.
– Ова е навистина добра вест за нас, бидејќи со текстот на Резолуцијата сега се дава можност да се запознаат многу малциства во светот. Со Резолуцијата, во име на Македонското друштво „Илинден“ и македонското национално малцинство во Република Албанија, меѓу другото, се бара од Владата на Република Албанија да ја потпише и ратификува Европската повелба за регионални или малцински јазици, да преземе ефективни мерки за заштита на македонскиот идентитет од негирање и асимилација, Општина Пустец да остане посебна единица на локалната самоуправа и во рамките на новата административно-територијална реформа, како и Општина Пустец да се преименува во Општина Преспа, истакна Никола Ѓурѓај.
Резолуцијата, ФУЕН ја достави до Владата на Република Албанија, шефот на државата, Парламентот и меѓународните институци. (Англиски: https://fuen.org/assets/upload/editor/docs/doc_lQNhcA9k_Resolutions%202026%20EN_web.pdf
Германски: https://fuen.org/assets/upload/editor/docs/doc_vMpXvOCS_Resolutions%202026%20DE_web.pdf
Руски: https://fuen.org/assets/upload/editor/docs/doc_15stWeCP_Resolutions%202026%20RUS_web.pdf)
Резолуцијата едногласно беше усвоена на 70. Конгрес на ФУЕН, кој се одржа во Хелсинки, Финска, а на кој учествуваа претставници на 100 организации-членки од 38 европски земји.
Македонско друштво „Илинден”-Тирана е рамноправен член на ФУЕН од средината на мај 2015 година и стана прво друштво на Македонци, кое е рамноправен член, со право на глас.
