Минусни утрински температури, потопло време во пладневните часови придонесоа за зголемување на бројот на пациенти кои бараат лекарска помош во Ургентниот центар при Општата болница во Куманово. Најчесто пациентите бараат помош за респираторните симптоми, кивање, кашлање, течење на носот и покачена телесна температура.
Д-р Дарко Каранфиловски од Ургентниот центар посочува дека здравствените тегоби се јавуваат кај различни возрасни групи, но поголем ризик од компликации имаат децата, повозрасните лица и пациентите со хронични респираторни и кардиоваскуларни заболувања.
– Нема одредена категорија која е погодена, сите имаат симптоми, но најризични се повозрасните лица и децата, како и пациентите со хронични респираторни и кардиоваскуларни заболувања. Кај лицата со астма и хронична опструктивна белодробна болест можни се компликации, вклучително и дополнителни инфекции на долните дишни патишта, кои значително влијаат врз здравјето на пациентите – нагласи Каранфиловски.
Лекарите препорачуваат практикување здрави животни навики, што вклучува редовен сон, физичка активност и разновидна и балансирана исхрана.
Посебно внимание се препорачува кај лицата со хронични заболувања, кои треба да ги следат советите од матичните лекари и редовно да ја земаат пропишаната терапија.
Вакцинацијата против сезонски грип е особено важна за категориите граѓани изложени на поголем ризик од потешка клиничка слика и компликации.
Витамините и минералите треба да се внесуваат според индивидуалните потреби, по совет од стручно лице, додека антибиотиците не треба да се земаат без лекарски преглед и препорака.
