– Библиотеките од Делчево, Берово, Пехчево, Кочани и Штип денеска во читалната на Јавната локална библиотека „Илинден“ – Делчево одржаа трибина на тема „Под сводовите на храмот – црковно книжно наследство на крајниот Исток“, посветена на значењето, истражувањето и зачувувањето на старото книжно наследство што се чува во црквите и манастирите во источниот регион.
На трибината присуствуваа градоначалникот на Општина Делчево, Иван Гоцевски, и епископот на Делчевско-каменичката епархија, г. Марко.
На средбата, како што истакна директорката на делчевската библиотека Билјана Петровска, беше посочено дека во храмовите и манастирите, покрај предметите поврзани со верскиот живот, се чуваат и книги, ракописи, записи, богослужбени книги, летописи и други пишани сведоштва, кои можат да дадат значајни податоци за времето во кое настанале, луѓето што ги користеле, како и за духовниот и културниот живот на населението од овие краишта.
-Дел од ова наследство сè уште не е доволно истражено и евидентирано, поради што библиотеките сметаат дека е потребно воспоставување посистематска соработка со цел негово идентификување и документирање. Во храмовите не се чуваат само предмети од верата. Се чуваат книги, ракописи, записи, богослужбени книги, летописи и други пишани сведоштва кои можат да ни раскажат многу за времето во кое настанале, за луѓето кои ги користеле и за духовниот и културниот живот на нашите предци, истакна Петровска.
Учесниците разговараа за можноста библиотеките од регионот да започнат заедничка активност за истражување и создавање евиденција на црковното книжно наследство, доколку биде постигната согласност за нејзина реализација.
Како една од можните следни активности беше посочено изработување унифициран образец за евиденција, со што би се создале услови за формирање регионална база на податоци, а во иднина и заеднички каталог на црковното книжно наследство од крајниот исток на Македонија.
-Целта не е само да се утврди што постои во храмовите и манастирите, туку наследството да се запознае, документира и да се придонесе кон неговото зачувување за идните генерации, беше главната оценка во рамки на дискусијата на трибината.
Учеството на епископот Марко, како што беше истакнато, придонесе темата да биде разгледана и од духовен и црковен аспект, додека присуството на градоначалникот Иван Гоцевски беше оценето како поддршка на иницијативата за истражување и заштита на културното наследство.
На трибината беа упатени благодарности и до претставниците на библиотеките од Штип, Кочани, Виница, Берово и Пехчево за учеството, со очекување соработката да продолжи и да прерасне во конкретен регионален библиотечен проект.
Иницијативата, како што беше посочено, има за цел разговорот за црковното книжно наследство да добие конкретна продолжение преку истражување, евидентирање и документирање на старите книги и писмени сведоштва што се чуваат во храмовите и манастирите во регионот.
