Архитектонските бариери за телесните инвалиди се најголем проблем, а има и други и за сите лица со инвалидност, истакна д-р Нико Јанков, претседател на Здружение на телесни инвалиди Мобилност-Битола, организатор на дефиле на телесни инвалиди кое денеска се одржа на Широк сокак во Битола.
Според Јанков, традиционалното дефиле на телесните инвалиди по Широк сокак се одржува со цел да се помогне на нивните членови и да се зголеми јавната свест во заедницата.
-Дваесет години одржуваме дефиле на телесни инвалиди по Широк сокак, и се со цел да помогнеме на нашите членови. Иако во нашата држава има добра законска регулатива, за жал таа не се практикува во стварноста. Архитектонските бариери за телесните инвалиди се најголем проблем, а има и други и за сите лица со инвалидност. Институциите се запознати со нашите проблеми, но решенијата доцнат и не заради немање на нивна желба, туку заради немање соодветна динамика. Ние не организираме демонстрација, туку тивок револт за јавно истакнување на нашите проблеми- нагласи Јанков.
Во изјава за медиумите, Василчо Илијев, адвокат од Кочани и член на здружението „Мобилност“ истакна дека во општество треба да се работи особено во доменот на јавната свест за потенцијалите, способностите и можностите на лицата со попреченост во општеството како активни двигатели на сите процеси.
-Состојбата на инклузија е нашироко промовирана како концепт, но сепак како општество треба уште да се работи особено во доменот на јавната свест за потенцијалите, способностите и можностите на лицата со попреченост во општеството како активни двигатели на сите процеси. Подобрувања во општеството има, но мора многу повеќе да се работи особено со децата од најмала возраст, во основните училишта да се осмислуваат едукативни содржини во кои попреченоста ќе се интегрира како нормална појава како дел од идентитетот на секое лице. Тоа според мене треба да биде во фокусот на заедницата во наредниот период. Со заедничка синергија мислам дека ќе има поголеми успеси за овие проблеми- истакна Илијев.
Во дефилето на телесните инвалиди по Широк сокак учествуваа членови на здружението „Мобилност“ од Битола, Ресен, Демир Хисар, Куманово, Кочани и други македонски градови.
