– Еколошка пешачка патека во должина од околу 14 километри, од браната на Тиквешко Езеро до Полошкиот манастир „Св. Ѓорѓи“, е во фаза на мапирање. Активностите ги спроведува еколошкото друштво „Тисовец“ од кавадаречкото село Возарци, со цел да се создадат услови за пешачење, рекреација и развој на одржливиот туризам во Тиквешијата.
-Пред теренскиот тим се наоѓа сериозен предизвик, особено делот од село Праведник. Станува збор за исклучително тежок, стрмен и обраснат терен, кој на одредени места е целосно неисчистен и тешко прооден. Мапирањето бара многу пешачење, внимателно утврдување на трасата и посветена работа на терен. И покрај тешкотиите, продолжуваме чекор по чекор, со цел да ја утврдиме трасата и да создадеме основа за нејзино идно уредување, чистење и обележување. Нашата цел е да ги поврземе природните убавини на Тиквешијата со културното и духовното наследство на Полошкиот манастир „Св. Ѓорѓи“, создавајќи можности за пешачење, рекреација, едукација и развој на одржливиот туризам – појасни Сашко Данов, претседател на здружението.
Тој истакна дека секој изоден дел од трасата е чекор поблиску до остварувањето на идејата – еко-патека што ќе им овозможи на граѓаните и посетителите подобро да ја запознаат природата и културното наследство на овој крај. Досега се одеше со чамец.
Притоа додаде дека проектот се спроведува во рамките на Регионалната програма за локална демократија во Западен Балкан 3 – ReLOaD3, која е финансирана од Европската Унија (ЕУ), а ја имплементира Програмата за развој на Обединетите нации (УНДП). Проектот е кофинансиран од Општина Кавадарци.
