Од објект со влага, прокиснати покриви и без топла вода, до модерен и енергетски ефикасен дом за 1150 студенти. По децении живеење во мизерни услови, домот „Стив Наумов“ доби целосно нов лик, а студентите – европски услови за живот. Студентскиот дом повторно ги отвори вратите за младите, а според најавите, ова е дел од поширок проект кој предвидува реконструкција на 9 студентски домови и 6 училишта со ресурсни центри, со вкупна инвестиција од 83 милиони евра.
„Денес конечно го имаме отварањето на „Стив Наумов“, делумно е вселен, студентите нема да мора веќе да се грижат за влага, дали е топло или ладно и сега ќе можат да се посветат на учењето“ – вели Весна Јаневска, министерка за образование и наука.
Подобрувањето на студентскиот стандард, и зголемувањето на енергетската ефикасност на јавните објекти има поддршката од ЕУ и германските партнери. Освен подобри услови за студентите, целта е да се намали потрошувачката на електрична енергија и емисиите на јаглерод диоксид.
„Ова е зелена инвестиција која ке придонесе за намалување на ЦО2 емисиите, инвестиција во младите е инвестиција во нашата иднина. На овој начин ќе имаат можност да учат, разменуваат идеи и да склучуваат пријателства.“- вели Евроамбасадорот Михалис Рокас.
„Го имаме овој проект за да обезбедиме подобра иднина за граѓаните, се залагаме и за енергетска ефикасна рехабилитација и ќе овозможиме зелена и одржлива иднина за сите.“- вели германската амбасадорка Петра Дрекслер.
Но, реконструкцијата не застанува тука. До крајот на годината треба да биде отворен и студентскиот дом „Кузман Јосифовски-Питу“ кој ќе отвори уште 280 студентски легла. Започнува и реконструкцијата на домовите „Пелагонија“ и „Томе Стефановски – Сениќ“, поради што тие нема да бидат во функција. Во Штип започнува реконструкцијата на студентскиот дом „Браќа Миладиновци“, а во Охрид годинва ќе се обновува домот за студенти „Никола Карев“.
