Виолинистката Наз Ирем Туркмен и пијанистката Марија Вршкова денеска ќе одржат концерт во Музејот на македонската борба, во рамки на 49. Денови на македонска музика.
Како што соопштуваат од Сојузот на композитори на Македонија, на програмата се дела од А. А. Сајгун, Сони Петровски, Томислав Зографски, Филип Иванов и Фазил Сај.
Туркмен е родена во Истанбул во 2006 година и студира виолина на Универзитетот „Моцартеум“ во Салцбург, во класата на професорот Хагаи Шахам. Добитничка е на награди на меѓународни натпревари за виолина во Одеса, Белгија и Будимпешта, а како солистка настапувала со повеќе оркестри во Турција.
Вршкова дипломирала и магистрирала пијано на Факултетот за музичка уметност во Скопје. Досега реализирала повеќе од 50 светски премиери на дела од македонски и странски композитори. Во 2023 година ја добила наградата „Георги Божиков“ на СОКОМ. Работи како вонреден професор и продекан за концертна дејност на Факултетот за музичка уметност во Скопје.
