Повеќе од 200 учесници и гости, меѓу кои и 10-те најдобри младински екипи по прва помош од државата, денеска во центарот на Скопје ќе бидат дел од Државниот натпревар по прва помош, највисокото натпреварувачко ниво во оваа област во организација на Црвениот крст на Македонија. Преку реалистично симулирани повреди и итни состојби, младите ќе ги демонстрираат своите знаења и вештини за навремено и правилно реагирање, испраќајќи порака за важноста на првата помош како животоспасувачка вештина.
Како што информираат организаторите, натпреварот претставува највисоко натпреварувачко ниво во областа на првата помош, а учесниците претходно обезбедиле пласман преку општинските и регионалните натпревари.
Свеченото отворање е закажано за 10:30 часот, а натпреварувачкиот дел ќе трае до 14:30 часот. Активностите ќе се реализираат на Плоштад Македонија и на повеќе локации во неговата околина, меѓу кои кај Македонскиот народен театар, Музејот на холокаустот, плоштадот Филип Втори, кејот на реката Вардар, Жена парк и Порта Македонија.
Во рамки на настанот се очекува присуство на повеќе од 200 учесници и гости. Најавено е и обраќање на градоначалникот на Скопје, Орце Ѓорѓиевски, кој е покровител на натпреварот.
Од Црвениот крст посочуваат дека настанот има за цел да ја афирмира првата помош како животоспасувачка вештина и да ја поттикне подготвеноста на младите за навремено и правилно реагирање во итни ситуации.
