Околу 14.500 првачиња ќе седнат во училишните клупи. Од министерството за образование велат дека бројката не е конечна, но е значително помала споредбено со минатите години. Разликата од над 4.000 ученици постепено се намалува, а се очекува бројот на запишани дополнително да се зголеми до крајот на август и во текот на септември, кога традиционално се реализираат дополнителни уписи на деца.
„Оваа година досега се запишани околу 14.500 првачиња. Но, потенцирам, тоа не е дефинитивна бројка затоа што во тек на целиот месец август и во септември ние дополнително запишуваме првачињата кои задоцниле на повикот за упис во прво одделение. Бројкат е помала од лани норазликата која претходно ја кажав над 4000 веќе се намалува.“ – вели министерката за образование и наука Весна Јаневска.
Помалку ученици ќе значат и помалку училишта. Во основните училишта има 200 паралелки помалку, а во средните 100. Од министерството очекуваат учебната година да започне и со 26 затворени рурални училишта каде што учат едвај десет ученици. Одлуката, велат од Министерството, не е само финансиска или административна, туку пред се образовна. Целта е учениците да не бидат изолирани туку да се социјализираат и да имаат поквалитетно образование.
„Не сакаме нивно изолирано постоење во одредена рурална средина каде што владеат одредени принципи, па и одредени стереотипи и каде што квалитетот на образованието не може да биде соодветен заради малиот број на ученици. Посебно ако станува збор за комбинирани паралелки каде што ученици од три различни одделенија – колку што со закон е дозволено – па да има 5 ученици – два во прво, еден во трето и два во пето оделение“ – нагласи министерката.
Ќе се затвараат образовни установи исклучиво онаму каде што има услови да се следи наставата во близина. Долго патување до најблиското централно училиште или пак несоодветен пат ќе играат главна улога во одлуката за затварање на училиштата. Но доколку објектот е во близина на 2 километри од друго училиште, од министерството велат дека не е соодветно да се чуваат децата заробени.
