Објектот во 2012 година бил безбеден, но пренамената од производствен погон во дискотека „Пулс“ отворила нова линија на одговорност. На денешното рочиште вештакот Горан Марковски потврди дека сопственикот не бил консултиран за реновирањето и материјалите што ги користел закупецот, но посочи и дека тој не е изземен од одговорност бидејќи според Законот за градење токму тој го поднесува барањето за пренамена на објектот. Со вкрстено испрашување продолжи судењето за трагедијата во кочанското кабаре.
Адвокатката на сопственикот на објектот, Гроздан Милковски, преку прашањата до вештакот Марковски се обиде да ја поткрепи тезата дека објектот во 2012 година, кога бил даден под закуп на Дејан Јованов, бил законски исправен и безбеден.
Вештакот, уште еднаш потврди дека несоодветните материјали придонеле за толку брзо ширење на пожарот.
Од семејствата на загинатите велат дека одбраната ги одолговлекува рочиштата, со поставување на нерелевентни и неколку пати досега одговорени прашања.
- „Вкрстеното испрашување треба да служи за проверка на доказите и утврдување на фактите и доказите, а не колку долго можат да издржат судот, вештаците и родителите бескрајно повторување на прашањата без судштина. Одбраната може да се брани, никој тоа не го успорува, ако има што да се побие во вештачењето, повелете со факти докумнти и стручни аргументи и конкретни прашања, но ако нема што да се побие, одолговлекувањето нема магично да го побие.. “ рече Александар Наунов – Здружение „16 Март“ Кочани.
Во пожарот во дискотеката „Пулс“ во Кочани животот го загубија 63 лица, а повеќе 200 беа повредени. На обвинителна клупа седат 34-ца, а иницијалното обвиение беше поднесено за 35-мина но во меѓувреме едно лице почина. На кривична одговорност се повикани и три фирми.
