Владата прави сè за да им помогне на превозниците и единствен начин ова да се реши е да се склучуваат билатерални договори со државите од Шенген– ова е одговорот на Вицепремиерот и министер за транспорт Александар Николоски откако Асоцијацијата на транспортери Макамтранс најави протест на 31-ви август. Тој вели дека Владата одамна знае и има разбирање за нивните проблеми дека не можат да останат да возат во Унијата повеќе од 90 дена во 6 месеци или 180 дена годишно. Информира дека Владата презема активности преку склучување на билатерални договори со земјите членки на Шенген зоната. Потенцира дека Македонија наскоро ќе склучи нови договори со други земји членки. По Швајцарија, Романија и Хрватска, следна ќе биде Австрија.
„Во текот на септември е најавена средба на високо ниво со австриската влада, во текот на октомври со словенечката влада, така што ние не застануваме и продолжуваме да работиме на билатерални договори со сите земји кои што се расположени“, истакна заменик претседателот на Владата и министер за транспорт Александар Николоски.
Главна цел е прво да се склучат договори со државите низ кои најчесто возат македонските пребозници. Николоски додава дека на овој начин се покриваат главните рути по кои се транспортираат стоките.
„Гледаме генерално да ги покриеме рутите каде што традиционално македонските транспортери најчесто одат. Со Швајцарија веќе има договор, со Хрватска има договор, со Романија има договор. Како што кажав, следни за разговор се Австрија и Словенија, и исто така работиме и со Германија“ – истакна Николоски.
Македонските превозници идниот понеделник се договорија да излезат на протест и два часа да ја блокираат крстосницата пред седиштето на Делегацијата на Европската унија во Скопје како знак на револт поради ограничувањата при нивниот престој во Шенген зоната. Ваков протест ќе има и во Србија, Босна и Херцеговина и Црна Гора.
