Црквата на локалитетот Кале, кај село Крупиште, каде што е откриено парче камен со глаголицата, чека на конзервација, откако завршија најновите археолошки истражувања. Штипските археолози целосно ја дефинираа архитектурата на катедралната базилика, која се смета за една од најзначајните локалитети поврзани со најраните траги од словенската писменост. Со тоа се создаваат услови овој вреден археолошки комплекс целосно да биде заштитен.
„Ја дефиниравме целата концепција, односно целата црква, се истражи мартириумот и така го дефиниравме целиот тој простор и се надевам дека и понатаму ќе можеме и таа црква да се конзервира, бидејќи мислам дека е единствената црква во Македонија, катедрала каде што е откриена глаголицата, значи парче камен со глаголицата“, изјави археологот Митко Штерјов.
Штерјов вели дека локалитетот Кале не е значаен само поради археолошките откритија, туку и поради историските записи. Според преданието, во црквата биле донесени моштите на Светите петнаесет маченици, а во грамотите на цар Душан е забележано дека во 1355 година двапати одржал состаноци во Крупиште.
„Таму стои и митот дека од Светите Петнаесет маченици се донесени моштите во оваа црква. Имаме пишан податок дека цар Душан одржал два состанока во Крупиште во периодот од 1355 година, кога доаѓаат Османлиите. Така да, не случајно тој ги одржал двата собири во Крупиште. Значи, тој податок стои запишан во грамотите на цар Душан“, изјави археологот Митко Штерјов.
Покрај истражувањата на Кале кај Крупиште, штипските археолози деновиве дојдоа и до уште едно значајно откритие. Кај Баргала беше откриена доцноантичка некропола со повеќе гробници, во кои се пронајдени коски на осум починати лица, меѓу кои и дете. Двата проекти се реализираат со финансиска поддршка од Министерството за култура и туризам.