Во Струга од денеска до 3 јули ќе се одржи 27. издание на Регионалниот летен универзитет, традиционална обука и средба на професори по француски јазик од земјите од Југоисточна Европа, во организација на Францускиот институт во Скопје.
На универзитетот ќе учествуваат професори од Албанија, Србија, Босна и Херцеговина, Косово, Црна Гора, Бугарија, Хрватска, Словенија, Турција, Романија и Унгарија.
Целта на обуката е промоција на францускиот јазик и зајакнување на неговото место во образовните системи на земјите-учеснички, како и поттикнување на професионална соработка и размена на искуства меѓу професорите по француски јазик и наставниците кои предаваат нејазични предмети на француски јазик.
Програмата е организирана во пет тематски модули, кои ќе ги водат француски обучувачи.
Настанот се реализира во партнерство со повеќе институции, меѓу кои Министерството за Европа и надворешни работи на Франција, Меѓународната организација на Франкофонијата, КРЕФЕКО, Здружението на професори по француски јазик (ЗПФРМ / АРФРМ), Амбасадата на Франција на Косово, Амбасадата на Франција во Албанија, Министерството за образование и наука на Република Северна Македонија, Францускиот институт во Србија, Францускиот институт во Босна и Херцеговина, Францускиот институт во Црна Гора, Фондацијата Бел Идеал, издавачките куќи Ашет и КЛЕ.
