Ненадејно почина градоначалникот на општина Брвеница Јовица Илиевски, соопштија премиерот Христијан Мицкоски и градоначалникот на Град Скопје Орце Ѓорѓиевски на социјалните мрежи.
-Со длабока тага ја примив веста за ненадејната смрт на Јовица Илиевски, градоначалникот на општина Брвеница.
Јовица беше работлив, чесен и скромен човек, целосно посветен на луѓето и на општината што ја водеше.
Функцијата ја разбираше како обврска кон граѓаните, а довербата што ја доби ја оправдуваше со работа, со присуство и со резултати, напиша премиерот Хртистијан Мицкоски на својот фејсбук профил.
Беше, како што посочи, секогаш меѓу луѓето. Ги слушаше, им помагаше и се бореше за нивните потреби. Затоа граѓаните му ја дадоа довербата и за втор мандат.
-Ќе го паметиме и како голем вљубеник во спортот, човек со силна енергија, искрен пристап и отворено срце.
Во овие болни моменти, моите мисли се со неговото семејство, со неговите најблиски, со граѓаните на Брвеница и со сите што го познаваа и почитуваа. Јоцо на последните избори ја добивме најважната битка за твојата Брвеница, твоето дело и споменот за тебе нема да биде заборавен. Вечен спомен!, стои во објавата на премиерот Мицкоски на фејсбук.
Скопскиот градоначалник Орце Ѓорѓиевски на својот фејсбук профил напиша дека со огромна тага ја примил веста за ненадејната смрт на, како што посочува, „мојот драг пријател, колега и пред сѐ голем човек, Јовица Илиевски“.
-Јоцо, сите сме во шок и неверување. Тешко е да се прифати дека повеќе не си меѓу нас, но уште потешко е да се најдат зборови за човек како тебе. Зад себе остави ведар дух, искрена насмевка, човечност и хумана мисија која допре до многу луѓе.Твојата желба да помогнеш, твојата добрина и твојата присутност ќе останат засекогаш во сеќавањата на сите кои те познаваа, напиша Ѓорѓиевски на фејсбук.
Упатувам, вели во објавата Ѓорѓиевски, длабоко сочувство до твоето неутешно семејство, до пријателите, колегите и до сите луѓе кои денес чувствуваат голема празнина поради твоето заминување.
-Брвеница е горда на тебе. Никогаш нема да бидеш заборавен. Вечна ти слава, другар, порача скопскиот градоначалник Орце Ѓорѓиевски во својата објава на фесјбук по повод смртта на Илиевски.
