Претседателот на Собранието, Африм Гаши, утре ќе отпатува за Софија, каде што ќе оствари билатерална средба со бугарската колешка Михаела Доцова, која ќе се одржи на нејзино барање. Состанокот ќе се одржи на маргините на седницата на Процесот за соработка во Југоисточна Европа, организирана од Европската Унија.
„Добивме покана од нив за билатерална средба, на која ќе разговараме за соработка на парламентарно ниво. Досега, имајќи ја предвид политичката ситуација во Бугарија, немавме никаква соработка и комуникација, а сега се трудиме да ги воспоставиме“, изјави Африм Гаши претседател на Собранието.
Тој не очекува дека на средбата Доцова ќе ги повтори барањата што бугарската потпретседателка Илијана Јотова ги упати до македонската претседателка Гордана Сиљановска-Давкова.
„Одам со позитивна мисла и со добро познатите позиции на државата, а тоа е дека треба да разговараме и заеднички да соработуваме на евроинтегративниот пат. Да одиме напред, да нè спојува иднината, а не минатото“, изјави Африм Гаши – претседател на Собранието.
На денешниот брифинг со новинарите, Гаши истакна дека лично е против идејата во блиска иднина да се организираат предвремени избори, оценувајќи дека тоа не е добро за државата.
„Сметам дека на земјава ѝ се потребни стабилност и спроведување реформи. Но, доколку мнозинството се согласи и изгласа распуштање на Собранието, тогаш воопшто нема да се противам на таквата одлука“, изјави Африм Гаши – претседател на Собранието.
Гаши посочи и дека наскоро ќе биде закажана седница за предлог-законот за правична застапеност, кој опозицијата го смета за спорен. Со него треба да се замени балансерот, кој претходно беше прогласен за неуставен од страна на Уставниот суд.
Срѓан Ивановиќ
