Над 100 претставници на технолошки компании, институции и организации од државата и од Грција денеска на форум во Скопје ќе разговараат за можностите за конкретна соработка, заеднички проекти и настап на регионалните и европските пазари.
Macedonia – Greece Digital Bridge & Business ICT Forum го организира Стопанската комора за информатички и комуникациски технологии – МАСИТ во соработка со грчката асоцијација SETPE.
Според организаторите, станува збор за еден од најголемите билатерални настани меѓу Македонија и Грција во последните години, со повеќе од 140 однапред организирани деловни средби меѓу компаниите и кој првпат се одржува на ниво на оваа индустриска гранка.
– Нашата цел е од овој форум да произлезат нови договори, а не само нови визит-картички. Веруваме дека македонските и грчките компании имаат многу повеќе простор за соработка отколку што денес го користат и токму затоа ги создаваме овие можности за директни средби меѓу нив – вели претседателот на МАСИТ, Јордан Димитровски.
Во рамките на форумот ќе биде потпишан и меморандум за соработка помеѓу МАСИТ и SETPE, со кој двете организации ќе воспостават поинтензивна соработка во областа на дигиталната економија, иновациите и технолошкиот развој.
Настанот ќе биде отворен од претставници на МАСИТ и SETPE, а најавено е учество и на министерот за надворешни работи и надворешна трговија, Тимчо Муцунски, заменик-министерот за дигитална трансформација, Радослав Настасиевиќ-Варџиски, и амбасадорката на Република Грција во Македонија, Софија Филипиду.
Покрај официјалниот дел, ќе се одржат презентации на компании од двете земји, како и B2B-средби посветени на создавање нови деловни партнерства и развој на конкретни бизнис-иницијативи.
