Во Куманово на три места ќе се градат урбани скверови, информираа надлежните. На последната седница на Советот со ребалансот на буџетот беа одвоени 9, 5 милиони денари за уредување на овие простори.
– Едниот се наоѓа на големиот градски плоштад, поранешен угостителски објекти, вториот спроти Комитет, исто така поранешен угостителски објект и уште еден кај „11 Октомври“- изјави градоначалникот на општина Куманово, Максим Димитриевски.
Претходно на овие локации, секторот за инспекциски надзор издаде решенија за отстранување на урбаната опрема на угостителските објекти.
Во тој период имаше налог за отстранување на четири објекти во централното подрачје. Според деталниот урбанистички план, на овие локации не е предвидена изградба на паркинг-простор, туку партерно уредување.
На локациите како што објаснија од секторот за комунални дејности ќе се постават урбана опрема, осветлување, детски реквизити, зеленило, скулптури.
