73 производи се во „есенската кошничка“ која ја скрои министерството за економија. Од следната недела до 31-ви октомври, брашното, лебот и пекарските производи, млекото и млечните производи, месото и преработките од месо, дел од овошјето и зеленчукот, ориз, грав, тестенини, масло за јадење, дел од конзервираните производи, како и безалкохолните пијалоци ќе бидат со ограничена бруто профитна маржа до 10% и во трговијата на големо и во трговијата на мало.
Трговците треба да ги одбележат производите со натписот „помалку трошоци, повеќе за тебе„ кој е објавен на веб – страницата на Министерството за економија и труд.
Со ваквата одлука, Владата очекува дека цените на производите кои се на листата ќе паднат и трошоците за храна ќе се намалат за околу 10 %.
Нашите проценки се дека со стапување на сила на оваа одлука трошоците за храна и безалкохолни пијалоци ќе се намалат во просек за околу 10%, со што ќе се намалат и трошоците за живот во потрошувачката кошница за групата храна и пијалоци. Трговците за производите кои се вклучени во есенската кошница и се поставени на полиците, фрижидерите и разладните уреди, треба јасно да ги обележат со натписот „помалку трошоци, повеќе за тебе„ кој е објавен на веб – страницата на Министерството за економија и труд. Исто така, трговците на големо и трговците на мало ќе имаат обврска за да ги прибавуваат и продаваат во месечни количини од најмалку 70% од прибавените количини во месец август 2024 година од овие производи на листата, рече Министерот Дурмиши.
Граѓаните ја поздравуваат мерката на Владата за таканаречената „есенска кошничка“ , но и апелираат ветеното да се исполни, а не да бидат излажани како што се случувало претходно.
Мерката ја поздравија и од ССМ, но укажуваат дека идејата треба да се спроведе во целост. Оттаму апелираат во формирањето на кошничката да се земе во предвид и пресметката на синдикатот. Според најавите од првиот човек на ССМ, ќе има благо зголемување на минималната синдикална кошничка која ќе биде објавена идната недела.
ССМ смета дека е добра идеја сè што се прави во интерес на работниците во насока на намалување на цените, но таа ќе треба да се спроведе во целост како што е планирана. Се надеваме дека делот на храна и пијалаци што го пресметуваме како ССМ и изнесува 22.300 денари за минатиот месец во синдикалната кошница ќе биде појдовна основа, рече Слободан Трендафилов – Претседател на ССМ
Мерката претходно ја поздравија и од Организацијата на потрошувачи на Македонија . Оттаму мислат дека ќе им помогне на граѓаните, но на краток рок. Министерот Дурмиши пак најави дека цените на долг рок ќе се стабилизираат токму со законот за нефер трговски практики кој ќе стапи на сила на крајот на месецов. Тој потврди дека мерката во наредниот период ќе се применува како божиќна , рамазанска, велигденска кошница со ограничено времетраење пред и за време на празниците кога вообичаено цените растат.
