39 полициски службеници направиле пропусти во постапувањето во случајот со Ивана – жената која трагично го загуби животот фрлајќи се од зграда заедно со своето дете. Внатрешната контрола на МВР утврдила сериозни слабости од ненавремена реакција, до недоволна координација меѓу службите…Според наодите, дел од органите не реагирале веднаш, а други не размениле информации како што треба. Од МВР велат – ќе има одговорност. Најавени се дисциплински постапки за сите кој направиле пропусти.
„Одделот за внатрешна контрола, криминалистички истраги и професионални стандарди при МВР утврди пропусти во постапувањето на 39 полициски службеници кои постапувале по пријавите за семејно насилство. Одделот достави известување до Основното јавно обвинителство за гонење на организиран криминал и корупција“, соопштија од МВР.
Случајот веќе е во рацете на обвинителството. Од ОЈО ГОКК велат предметот ќе го преземе јавен обвинител кој ќе утврдува дали има одговорност кај службените лица.
„Известувањето за кое покажувате интерес е доставено до ОЈО ГОКК во текот на вчерашниот ден и истото ќе биде дадено на постапување на јавен обвинител од Специјализираното одделение за гонење на кривични дела сторени од лица со полициски овластувања и припадници на затворската полиција“, велат од Обвинителството за гонење организиран криминал и корупција.
Стојанче Јовановски вчера во судот призна дека ја тепал и ја загрозувал сигурноста на сопругата Ивана, но не и дека ја навел да си го одземе животот. Тврди дека бил принуден да признае вина и дека за трагедијата виновен е друг човек, што судот не го прифати.
Обвинителството вели дека тој се обидува да манипулира и најави докази за сите обвиненија.
Сведочењето на мајката на Ивана откри години насилство тепања, закани и малтретирање, на кои Ивана често молчела.Таа раскажа и за драматични ситуации, кога Ивана била претепана, турната по скали во болница, па дури и оставена на автопат со детето..
Насилството продолжило до последниот ден, кога, според сведоштвата, по сериозни закани и физички напад, Ивана заедно со ќерката скокнала од шести кат. Судењето продолжува утре…