12 години затвор за Васил Јованов кој пијан, со брзина над дозволената минувајќи на црвено светло на пешачки премин на булеварот Партизанска смртно ја прегази младата Фросина Кулакова. Судот образложи дека во предвид биле земени сите отежителни и олеснителни околности. Меѓу отежителните е дека Васил Јованов веќе бил осудуван за трговија со дрога, имал голем број сообраќајни прекршоци пред трагедијата, возел со многу поголема брзина, поминал на црвено, немал положен возачки испит. Меѓу олеснителните се признанието на вина, изразувањето сочувство кон семејството, дека покажал каење веднаш по трагичниот настан, дека бил редовен студент и спортист.
-Седнал зад воланот под дејство на алкохол и со количина на алкохол во организмот кој многуркатно ја предминува границата предвидена во законот за возачи кои не поседуваат возачка дозвола. И во таква состојба развил брзина на движење од 91 километар на час, во населено место со фреквенција на минувачи за да потоа на запалено црвено светло, на семафор на задолжително запирање, продолжи со движење на пешачки премин, каде удира пешак кој се движел прописно на пешачкиот премин, стои во образложението на пресудата.
Сепак оваа пресуда не ги задоволи родителите. Веднаш откако слушна колкава е казната, таткото на Фросина, Тодор Кулаков демонстративно ја напушти судница и го прогласи судот за мафија.
-Судот мафија, казни ме сега, судот мафија, демонстративно кажа Тодор Кулаков.
Според него, 12 години затвор не е казна, туку награда за вакво најбрутално можно убиство во сообраќајот.
-Во државата во која дилерите на дрога и немилосрди убијци се прогласуваат за светци, спортисти, посветени студенти, според зборовите на одбраната, а што очигледно најмалку наивно беше прифатено од судскиот систем, судијата, изјави Кулаков.
Пресудата во судница ја слушнаа и од семејството на Васил Јованов. Одбраната искажа незадоволство од ваквата казна, која била највисока за ваков прекршок на скопското апелационо подрачје.
-Иста ваква сообраќајна незгода во 2019-та година, на истиот пешачки премин, само од другата страна е завршена правосилно со три и пол години. Сетете се на предметот во Велес, имате еден прекршок повеќе, бидејќи се даде во бегство и два дена беше недостапен и прависолно се даде осум години, изјави адвокато на Васил Јованов, Сашко Дукоски.
Обвинителството пак изрази задоволство што ова е највисоката казна, но можно е да ја обжалат пресудата и да побараат повисока.
-Денешниот ден за Обвинителството е поголема победа, затоа што беше изречена казна затвор која што историјата на овој суд, за ова кривично дело и кога станува збор за една почината една жртва не била досега изречена, изјави обвинителот Александар Маркоски.
Несреќата за која Јованов доби 12 години се случи вечерта на 29 јануари на булеварот Партизанска, а на лице место животот го загуби 22 годишната Фросина Кулакова.
Матеја Петровски
