Нема да има продолжување на зимскиот распуст. Учениците на настава ќе се вратат на 20 јануари, соопшти министерката за образование и наука, Весна Јаневска. И покрај порастот на заболени од грип, насоките од Институтот за јавно здравје и Министерството за здравство се второто полугодие да започне согласно утврдениот план. Министерката упати апел до учениците и родителите за редовно посетување на наставата и што помалку изостаноци.
„Сите училишта ќе почнат навремено со новата учебна година, вчера веќе имавме од Министерството за здравство и од Институтот за јавно здравје дека нема да има пречки за почеток на новата учебна година. Апелирам до родителите и учениците да бидат редовни во училиштето и што е можно поретко да изостануваат, затоа што сите испитувања и во Македонија и во светот велат дека учениците кои редовно посетуваат настава даваат добри резултати“, изјави министерката за образование, Весна Јаневска.
Министерката Јаневска посочи дека научно-истражувачката дејност е меѓу врвните приоритети на Владата. Таа информираше дека се зголемени платите на професорите, како и средствата за наука, со цел професорите поинтензивно да се вклучат во научно-истражувачката дејност и своите трудови да ги објавуваат во светски признати списанија.
„Апелирам да бидат вклучени и студентите, но и универзитетите малку да се реорганизираат, да спроведат формирања на стартапи, хабови и, се разбира, врв на целата наша заложба е проектот кој го водиме како Влада, за формирање на првиот научно-технолошки парк во Македонија“, изјави министерката за образование и наука, Весна Јаневска.
При посетата на штипскиот Универзитет, министерката Јаневска ги образложи критериумите предвидени со новиот Закон за високо образование, кои академскиот кадар ќе мора да ги исполни за избор и унапредување во повисоко академско звање.
