Општина Чаир ја промовира новата платформа „Чаир во ритамот на здравјето“, чија прва активност е насочена кон заштита на граѓаните од најавените високи летни температури, преку серија превентивни и здравствени мерки.
Како што соопштуват од локалната самоуправа, во рамки на акцијата, општината изврши проверка и санација на сите јавни чешми на својата територија, а на најфреквентните локации ќе бидат поставени дополнителни пунктови со вода за освежување на граѓаните. Планирано е и поставување медицински пунктови на јавни површини, каде што стручни лица и волонтери ќе даваат совети за заштита од топлотни бранови, како и основни лекарски прегледи.
Во активностите ќе се вклучат и здравствените домови од Чаир, Центарот за јавно здравје и други релевантни институции, со цел подигање на свеста за значењето на здравствената превенција во летниот период.
Оваа иницијатива претставува почеток на долгорочната платформа „Чаир во ритамот на здравјето“, која има за цел да го унапреди здравјето на граѓаните, да поттикне здрави животни навики и да ја зголеми информираноста за превентивната медицина.- Во услови на брз и динамичен живот, превенцијата на здравјето на граѓаните и градењето на здрави животни навики е приоритет. Чаир е општина која не се грижи само за инфраструктурата, туку и за луѓето, бидејќи тие се најважни. Ние не реагираме само кога ќе се појави проблем, туку навреме започнуваме со активности кои ќе одговорат на најголемите предизвици на современиот живот – навремена здравствена превенција. Ги повикувам граѓаните активно да се приклучат во активностите, бидејќи здравјето е наш најголем дар. Воедно, сите активности ќе бидат бесплатни и достапни за граѓаните – истакна градоначалникот Изет Меџити.
Платформата ќе опфати низа активности поврзани со јавното здравје, правилна исхрана, физичка активност и грижа за ранливите категории, а ќе се реализира со учество на стручни лица од областа на медицината, нутриционизмот, спортот и едукацијата.
