Доизградба на пешачката патека кон манастирскиот комплекс „Св. Јоаким Осоговски“, на потегот Бабин Дол, е најновата инвестиција што ќе ја реализира Општина Крива Паланка за подобрување на туристичката инфраструктура и поголема пристапност до еден од најзначајните духовни и културно-историски локалитети во државата. Инвестицијата е дел од новиот европски проект од ИПА Програмата за прекугранична соработка со Република Србија.
Проектот е насочен кон создавање нови можности за развој на верскиот, културниот и активниот туризам.
-Овој проект претставува уште една потврда за успешната работа на Општина Крива Паланка во подготовката и реализацијата на европски проекти, како и за нејзината лидерска позиција меѓу македонските општини во искористување на средствата од Европската Унија, изјави градоначалникот на Општина Крива Паланка, Сашко Митовски, денеска при потпишување договорот за финансирање на овој нов проект за прекугранична соработка што ќе се реализира во партнерство со Град Лесковац, Центарот за развој на Јабланичкиот и Пчињскиот округ и Народниот музеј Лесковац.
Вкупната вредност на проектот изнесува 624.753,71 евра, од кои 499.303,17 евра се грант средства обезбедени од Европската Унија, а за активностите во Општина Крива Паланка се предвидени околу 200.000 евра.
Митовски истакна дека Општина Крива Паланка останува посветена на креирање и спроведување на развојни проекти кои носат конкретни придобивки за граѓаните, ја подобруваат локалната инфраструктура и поттикнуваат економски и туристички развој на општината.
