Венецуела се соочува со катастрофални последици по двата силни земјотреси. Спасувачите брзаат да ги пребараат урнатините за да спасат животи. Венецуелските власти засега пријавуваат најмалку 235 загинати , над 4.300 повредени и над 40 илјади исчезнати.
Многумина останаа без домови. Околу 250 згради се целосно урнати, додека уште стотици се во опасност од уривање.
На терен, ситуацијата е критична поради недостигот на тешка механизација и напредна опрема за пребарување. Снимките од Каракас и Ла Гваира покажуваат како спасувачките екипи и локалното население користат мобилни телефони како извори на светлина за пребарување низ урнатините во темница.
Според достапните информации, во градот Ла Гваира, еден од најтешко погодените, десетици луѓе ограбиле неколку продавници и деловни објекти во текот на ноќта.
Во трката со времето за пронаоѓање преживеани, меѓународната заедница започна масовна операција за помош. САД издвоија 150 милиони долари и ја ангажираа Јужната команда на американската армија за логистичка поддршка. Помош пристигна и од Германија која испрати специјализирана опрема и обучени кучиња за пребарување. Се мобилизираа и Мексико, Бразил, Катар, Шпанија, Колумбија.
Катастрофата се случи во момент кога Венецуела веќе се бори со долгогодишна економска криза, висока инфлација и нестабилно снабдување со енергија. Привремената претседателка Делси Родригез прогласи вонредна состојба и најави формирање на почетен фонд од 200 милиони долари за обнова на инфраструктурата и болниците.
