Михалис Рокас, амбасадорот на Европската Унија во Македонија, денеска ќе ја посети општина Гостивар. Посетата е дел од иницијатива чија цел е да го приближи ЕУ и процесот на интеграција на земјата до локалните заедници.
-Посетата на Гостивар ќе започне со средби меѓу амбасадорот Рокас, градоначалникот Валбон Лимани и членовите на Општинскиот совет. Тие ќе разговараат за придобивките од пристапувањето во ЕУ, како и за видливото влијание на проекти финансирани од ЕУ врз секојдневниот живот на луѓето во регионот, информираат од Делегацијата на ЕУ во Скопје.
За време на посетата, амбасадорот Рокас ќе се сретне и со претставници на граѓанското општество и ќе учествува во отворена дискусија со граѓаните на Гостивар.
Програмата вклучува и презентација на програмата LIFE финансирана од ЕУ и можностите за финансирање во областите на животната средина, климатската акција и транзицијата кон чиста енергија, одржана од претставници на проектот eHUB4LIFE. Презентацијата ќе ја отворат градоначалникот Лимани, амбасадорот Рокас и министерот за животна средина и просторно планирање Муамет Хоџа.