Општина Маврово и Ростуше денеска се вклучи во акцијата „Генералка викенд” и преку масовно учество во оваа национална активност уште еднаш ја покажа својата силна еколошка свест.
Предводени од градоначалникот Онер Јакупоски, во акцијата се вклучија вработените во општинската администрација, Комуналното претпријатие, како и наставниот кадар и учениците од сите општински основни и средното општинско училиште.
Акцијата беше фокусирана на темелно чистење и уредување на неколку клучни точки и тоа просторот околу спортската сала „Македонија”, популарните пешачки патеки, јавните површини и фреквентните локации во населените места.
-Грижата за природата започнува со личен пример. Денешното присуство на нашите ученици и просветни работници заедно со администрацијата е најдобар доказ дека младите генерации се клучот за почиста иднина. Наша обврска е да го чуваме овој природен бисер не само денес, туку секој ден – порача меѓу другото градоначалникот Јакупоски.
Оваа акција, додаде, не е само чистење, туку и лекција по заедништво и одговорност кон средината во која живееме.
Изрази голема благодарност до сите волонтери кои се приклучија и придонесоа Маврово и Ростуше да биде поубаво место за сите, порачувајќи „Да ја чуваме природата – таа е нашиот заеднички дом”.
