Власите се нераскинлив дел од кодот на Македонија. Дел од нејзината меморија, нејзината борба, нејзината култура и нејзиниот дух, напиша попладнево скопскиот градоначалник Орце Ѓорѓиевски на неговата Фејсбук-страница.
– Народ што низ вековите знаел да го зачува својот јазик, својата песна, своите обичаи и своето достоинство, но, никогаш не стоел настрана од судбината на оваа земја. Напротив, бил дел од секоја нејзина борба, секој нејзин подем и секоја нејзина надеж. Со посебна почит денес го спомнуваме славниот Питу Гули, кој е симбол на храброст, чест, пожртвуваност и љубов кон слободата. Тој е гордост на Власите, но и гордост на цела Македонија. Убавината на Македонија е токму во различностите. Во јазиците, културите, традициите и обичаите што живеат на ова наше мало, но, свето, парче земја, обединети со љубов кон истиот дом. Влашкиот јазик, културата, песната, традицијата и идентитетот се богатство на сите нас. Сакам јасно да порачам – секогаш ќе бидеме ваша поддршка – додава Ѓорѓиевски.
Нагласува дека Град Скопје ќе се заложи влашката заедница да добие своја Влашка куќа – место што ќе биде дом на културата, традицијата, јазикот и идентитетот на Власите.
– Место кое ќе сведочи дека она што е вредно, мора да се чува. Посебно сакам да го спомнам и мојот драг пријател Папули, човек кој со достоинство ја носи љубовта кон својот народ, своето потекло и своето семејно наследство. Со голема почит се навраќам и на неговиот татко, човек чие име и дело заслужуваат трајно сеќавање. Токму затоа, во негова чест, во Кисела Вода изградивме спомен-обележје како знак на благодарност, почит и вечна меморија. Македонија е силна кога сите нејзини заедници се силни. Македонија е горда кога секоја традиција се почитува. Македонија е достоинствена кога секој граѓанин чувствува дека припаѓа, дека е важен и дека неговиот идентитет е вредност. Нека ви е честит Националниот ден на Власите. Нека живее влашката заедница. Нека живее нашата заедничка Македонија – порачува Ѓорѓиевски во објавата.
