Делегација на пратеници од Клубот за младински прашања и политики, во состав: Драгана Бојковска, Мартин Стојановски, Мимоза Муса и Борче Цветков, оствари работна посета на Европскиот парламент во Брисел, каде што учествуваше на програмата “Надминување на јазот” (Bridging the Gap), посветена на младинското учество во процесите на креирање политики, регионалната соработка и европската интеграција, која се оддржа од 22 до 25 јуни 2026 година.
Целта на настанот, како што информира собраниската прес-служба, била да се поттикне дијалогот за политичкото учество на младите, развојот и унапредувањето на младинските политики, како и зајакнувањето на соработката меѓу институциите и граѓанското општество во регионот на Западен Балкан.
Во рамките на посетата, пратениците од Клубот за младински прашања и политики при Собранието на Македонија оствариле средби со европратеници и претставници на граѓанскиот сектор од регионот. Тие имале можност да разменат искуства и ставови со претставници од земјите од Западен Балкан, како и да воспостават и продлабочат соработка со претставници на Европскиот парламент.
Клубот за младински прашања и политики, велат од македонското Собрание, го продолжува континуитетот на активна соработка со Европскиот парламент и партнерските организации во креирањето и усогласувањето на младинските политики, со цел младите активно да се вклучат во градењето на европската иднина на регионот, како и да ги унапредат своите знаења, вештини и можности за учество во општествените процеси.
