Министерот за правда Јетон Шасивари оствари работна средба со директорот на Агенцијата за примена на јазикот Гранит Османи, посветена на унапредување на институционалната соработка и доследната примена на Законот за употреба на јазиците. Беше нагласено дека целосното спроведување на Законот претставува законска обврска и суштински елемент на владеењето на правото, правната сигурност и еднаквиот пристап на граѓаните до институциите, информираат од Министерството за правда.
Министерот Шасивари ја потврдил определбата на институцијата со која раководи за јакнење на институционалните механизми што обезбедуваат почитување на законските одредби и гарантирање на јазичните права на граѓаните.
Османи, пак, на средбата посочил дека Агенцијата за примена на јазикот обезбедува стручна и практична поддршка на државните институции во спроведувањето на Законот за употреба на јазиците, преку насоки, препораки и експертска помош.
Агенцијата, нагласил тој, се грижи за унапредување на службената употреба на албанскиот јазик, кој го зборуваат најмалку 20 проценти од граѓаните, како право загарантирано со закон.
Во периодот кој следува ќе се продлабочи институционалната соработка, координацијата и заедничките активности што ќе придонесат за поефикасна и доследна примена на Законот за употреба на јазиците во сите државни институции.
