Во рамки на активностите за превенција од пожари, што ги реализира Секторот за внатрешни работи-Охрид, полициски сужбеници од дебарското одделение остварија средби со месното население на дебарските села Селокуќи, Спас, Крифци и Бањиште, а извршија и обиколка на поширокиот шумски појас и Бањишко Поле.
-Целта е подигнување на јавната свест за потребата од заштита на шумите од пожари и спречување на пожари на отворен простор. Низ непосредни интерактивни контакти со граѓаните на овие подрачја, беше укажано на потребата од зголемена внимателност при чистење на нивите и стрништата, воздржување од горење на смет и друг отпаден материјал заради поефикасна заштита од појава и проширување на пожари, информираше Стефан Димоски, портпарол на СВР-Охрид.
Според него посебно беше укажано на потребата од итно информирање на надлежните институции при забележан пожар на отворен простор. На присутните граѓани им биле поделени летоци со корисни совети и насоки за постапување.
Поради високите температури и зголемениот ризик од пожари апел до сите граѓани да се однесуваат одговорно упатија и од Територијалната перотивпожарна единица, која во изминатиот период од годинава имала повеќе интервенции од лани истиот период, главно на отворен простор. Од над 84 интервенции 52 се на отворен простор.
