Осумнаесетгодишниот Џефри Џил, светски шампион во пливање во ледени води, денеска беше примен од градоначалникот на Општина Делчево, Иван Гоцевски. Џил, кој живее во Англија, но има потекло од Делчево, неодамна освои златен и сребрен медал на Светското првенство во пливање во ледени води во Финска, настапувајќи под македонско знаме.
На средбата присуствуваше и неговата мајка Сули Хоуп, која истакна дека и покрај тоа што семејството речиси три децении живее во Англија, љубовта кон Македонија и родното Делчево никогаш не згаснала.
– Џефри отсекогаш сакаше да ја претставува Македонија. Кога разговаравме со претставници на институциите, тој не побара финансиска помош, туку само можност да настапува под македонско знаме. Тоа беше неговата најголема желба, рече Хоуп.
Џил говореше и за предизвиците на Светското првенство во Финска, каде температурите на водата биле блиску до нулата, а подготовките ги реализирал со импровизирани услови, бидејќи немал пристап до специјализирани тренинг-центри како неговите конкуренти.
– Многу сум горд што како Македонец успеав да испишам историја и да освојам златен медал. Би сакал мојот пример да ги мотивира младите да веруваат во себе. Не е најважно да имате многу средства, туку желба, дисциплина и посветеност, изјави Џил.
Градоначалникот Иван Гоцевски истакна дека Делчево е особено гордо на успесите на младиот спортист, кој во изминатите две години оствари резултати што ретко кој македонски пливач ги постигнал.
– Џефри не ја направи горда само својата фамилија, туку и Делчево и Македонија. Минатата година го преплива Ламанш, а годинава стана светски шампион во една од најекстремните пливачки дисциплини. Посебно радува што, иако живее во Англија, со гордост настапува под македонско знаме и никогаш не ги заборава своите корени. Тој е вистински пример како се сака татковината и како таа љубов се пренесува на идните генерации, изјави Гоцевски.
Тој најави дека ќе оствари комуникација со Министерството за спорт за да се разгледаат можностите за поголема институционална поддршка на младиот пливач, кој веќе ги исполнува критериумите за настап на најголемите светски натпреварувања.
На крајот од средбата, Гоцевски му посака на Џил успешно продолжување на спортската кариера и изрази надеж дека во иднина ќе обезбеди и настап на Олимписките игри.
– Од срце му посакуваме еден ден да застане на олимпискиот победнички пиедестал и да ја слушнеме македонската химна, подвлече на крај од средбата Гоцевски.
